जनतापत्र, काठमाण्डौं ।
चौतारा साँगाचोकगढी नगरपालिका वडा नं. १४ ले सामाजिक सुरक्षा भत्ता नवीकरणसहितका विभिन्न सेवाहरूलाई सहज र पहुँचयोग्य बनाउन घुम्ती शिविर सञ्चालन गरेको छ। शिविरमार्फत वडा क्षेत्रका बासिन्दालाई काठमाण्डौंको विभिन्न क्षेत्रमा घुम्ती शिविर सञ्चालन गरेको हो ।

शिविरको सञ्चालनमा वडा अध्यक्ष उद्दब नेपाल, वडा सचिव पुनम भण्डारी, स्वास्थ्य इकाइ प्रमुख अमृत लामा र कार्यालय कर्मचारी जीवन भण्डारीको सक्रिय भूमिका रहेको थियो। निर्धारित तालिका अनुसार २१ साउनमा कोटेश्वर, २२ साउनमा कपनस्थित रियस्का मोटर ड्राइभिङ, २३ र २४ साउनमा मुलपानीस्थित थ्री–एस मोटर ड्राइभिङमा सेवा प्रदान गरिएको थियो।
चार दिनसम्म चलेको शिविरमा करिब २२० जनाले सेवा लिएका थिए। यसमध्ये २३ साउनमा मुलपानीमा मात्र ७९ जना सेवाग्राही उपस्थित थिए। सामाजिक सुरक्षा भत्ता नवीकरण बाहेक स्वास्थ्य सम्बन्धी परामर्श तथा आवश्यक कागजी प्रक्रिया सम्बन्धी सहयोग पनि गरिएको वडा कार्यालयले जनाएको छ।
वडा अध्यक्ष उद्दब नेपालका अनुसार आगामी दिनमा महिनामा एक पटक काठमाडौंमै घुम्ती शिविर सञ्चालन गरिनेछ। साथै गाउँ क्षेत्रमा पनि टोलटोलमा पुगेर एक हप्तासम्म घरदैलो सेवा सञ्चालन गरिएको छ, जसबाट विशेषगरी वृद्ध, अशक्त, अपांग र दूरदराजका नागरिकहरू लाभान्वित भएको जनाइएको छ।
वडा कार्यालयले यस्तो पहलले सेवाग्राहीको समय र खर्च बचत हुने, सेवामा पहुँच सहज हुने र स्थानीय सरकारप्रति विश्वास बढ्ने अपेक्षा लिएको छ।