जनतापत्र,चौतारा सिन्धुपाल्चोक ।
चौतारा सागाचोकगढी नगरपालिका– नगर महिला सञ्जालले आज तीज विशेष दर खाने कार्यक्रम भव्यताको साथ सम्पन्न गरेको छ । महिलाबीच आपसी हार्दिकता, आत्मीयता र शुभकामना आदान–प्रदान गर्दै स्मरणीय बनाउन आयोजित कार्यक्रममा उपस्थित सबैले तीजको उल्लास साझा रुपमा मनाएको हो ।
कार्यक्रमको अध्यक्षता नगर महिला सञ्जालकी अध्यक्ष जनुका नेपालले गर्नुभएको थियो भने सांसद अमृता नेपाल प्रमुख अतिथिका रूपमा उपस्थित हुनुहुन्थ्यो ।
प्रमुख अतिथि अमृता नेपालले शुभकामना मन्तव्य राख्ने क्रममा समाजमा अझै पनि विद्यमान बहुविवाहजस्ता समस्याहरूबारे चिन्ता व्यक्त गर्दै त्यसलाई अन्त्य गर्न सबै मिलेर लाग्नुपर्नेमा जोड दिनुभयो ।
साथै उहाँले नयाँ पुस्ता सही मार्गमा अघि बढोस् भन्ने उद्देश्यले आफ्ना सन्तानलाई मोबाइलजस्ता प्रविधिमा अत्यधिक निर्भर हुन नदिई अनुशासित बनाउन अभिभावकहरूले विशेष ध्यान दिनुपर्ने कुरामा समेत जोड दिनुभयो ।
त्यस्तै, नगर महिला सञ्जालका पदाधिकारी तथा विभिन्न वडा महिला सञ्जालका प्रतिनिधिहरुको उत्साहपूर्ण र बाक्लो उपस्थिति रहेको कार्यक्रममा सहभागी महिलाहरुले दर खाँदै आपसी सद्भाव र एकताको सन्देश प्रवाह गरेका थिए ।