जनतापत्र, चौतारा ।
चाडपर्व नजिकिएसँगै चौतारा नगरपालिकाले अनुगमन कार्यलाई अगाडी बढाएको छ ।
नगरले सुरु गरेको अनुगमनमा म्याद गुज्रिएको सामाग्रीहरु फेला पारेका छन् । जसलाई नगरले नष्ट पारिदिएको छ ।
अनुगमनको क्रममा म्याद गुज्रिएको चाउचाउ, चकलेट, पेय पदार्थ र सुर्तीजन्य पदार्थ अनुगमन टोलीले फेला पारेका हुन् ।
अनुगमन समितिले दिएको जानकारी अनुसार, फेला परेको सामानहरु जफत गरि नष्ट गरिएको छ । बुधबार र बिहिबार चौतारा साँगाचोकगढी नगरपालिका बजार अनुगमन समितिले नगरपालिकाको वडा नम्बर ५ को खाद्यन्न, होटल, हार्डवयर, औषधी, डेरी र अन्य पसलहरूको छड्के अनुगमन गरेको हो ।
नगर बजार अनुगमन समितिको संयोजक दुर्गा ढुंगेलको संयोजकत्वमा जिल्ला प्रशासन कार्यालय, जिल्ला प्रहरी प्रहरी कार्यालय, उद्योग तथा बाणिज्य कार्यालय, सिन्धुपाल्चोक उद्योग वाणिज्य संघ, नेपाल पत्रकार महासंघ, र नेपाल उपभोक्ता अधिकार मञ्चको संयुक्त टोलीले अनुगमन गरेको थियोे । उक्त अनुगमन टोलीले बिभिन्न प्रकृतिका ७० भन्दा माथिको पसलहरु अनुगमन गरेका थिए ।
अनुगमन समितका संयोजक दुर्गा ढुंगेलका अनुसार, अनुगमनको क्रममा फेला पारिएको म्याद गुज्रिएको सामग्रीहरु स्थानीयले देख्नेगरि नष्ट गरिएको र केही सामग्रीहरु जफत गरिएको बताउनुभयो ।
स्थानीय उपभोक्ताले नगरपालिकामा गुनासा गरेपछि अनुगमनलाई अगाडी बढाइएको हो ।ढुंगेलले नेपालीहरुको बिशेष पर्व दशै र तिहारमा बढी सामग्रीहरु खपत हुने हुँदा अखाद्य बस्तु र म्याद गुज्रिएका बस्तुहरु बिक्रि वितरण नहोस् भन्ने हेतुले समेत अनुगमन उहाँले जनाउनुभयो ।
११ आश्विन २०८१, शुक्रबार ०९:३५
