जनतापत्र, सिन्धुपाल्चोक |

‘कफी खेती गरौँ, स्वरोजगार बनौँ’ भन्ने मुल नारासहित २१ औँ राष्ट्रिय कफी दिवस–२०८२ को अवसरमा सिन्धुपाल्चोक जिल्लाको चौतारामा अवस्थीत न्यू अरनिको रिसोर्ट प्रा.लि.मा भव्य कार्यक्रम सम्पन्न गरिएको छ ।
समारोहमा बोल्दै प्रमुख अतिथि प्रमुख जिल्ला अधिकारी बन्धु प्रसाद बास्तोलाले कफी खेतीले ग्रामीण अर्थतन्त्र मजबुत बनाउने विश्वास रहेको बताउदै कफी दिवसको शुभकामना दिनु भएको छ ,
साथै उहाँले विश्व बजारमा कफीको माग उच्च रहेको बताउदै नेपालमा पनि यसको खेती र बजार बढ्दै जादा सरकारले पनि यसमा लगानी गर्दै आएको र विशेष गरि पहाडी जिल्लाहरूमा यसको सम्भावना धेरै रहेकोले किसानहरूलाई कफी खेती तर्फ आकर्षण गर्नुपर्ने धारण व्यक्त गर्नु भएको छ ।

कार्यक्रममा सामाजिक अगुवा, कृषक, व्यवसायी र स्थानीय जनप्रतिनिधिहरूको उल्लेखनीय उपस्थिति रहेको थियो । सहभागीहरूले कफी खेतीलाई दिगो आयस्रोतका रूपमा विकसित गर्न सरकारी तथा निजी क्षेत्रबीच सहकार्य अझ मजबुत हुनुपर्ने धारणा राख्नु भएको छ ।
कार्यक्रमका क्रममा विभिन्न प्रकारका कफी बनाउने तरिकाहरू बारेमा विस्तृत डेमोन्स्ट्रेसन प्रस्तुत गरिएको थियो । कफीको गुणस्तर, रोस्टिङ प्रक्रिया, स्वाद पहिचान र सही प्रविधिबारे सहभागीलाई व्यावहारिक रुपमा प्रदर्शन गरिएको थियो, जसले कार्यक्रममा थप आकर्षण भरेको सहभागीहरूले महसुस गरेका छन् ।
यसैगरी, अरनिको रिसोर्टका सञ्चालक दिपेन्द्र घलेले यो क्षेत्र कफी उत्पादनका लागि निकै सम्भावनायुक्त छ । किसानलाई प्रविधि, तालिम र बजार सुनिश्चितता प्रदान गर्न सके कफीले यहाँको आर्थिक रूपान्तरणमा ठूलो योगदान दिने समेत बताएका छन ।
साथै विश्व बजारमा गुणस्तरीय कफीको माग बढ्दै गएको तर प्रविधि प्रशिक्षण,आधुनिक प्रविधिको अभाव, कफी खेती र प्रशोधन सम्बन्धि ज्ञानको कमी रहदा कफीको माग पुरा हुन नसकेको बताएका छन ।
कार्यक्रमको आयोजना अरनिको एग्रो फर्मले गरेको हो। कफी उत्पादन, प्रशोधन, बजार विस्तार तथा कफी संस्कृतिको विकासमा आधारित छलफलसहित सम्पन्न यो कार्यक्रम किसान तथा स्थानीय समुदायका लागि अत्यन्त उपयोगी बनेको आयोजकले जनाएको छ ।