जनतापत्र,सिन्धुपाल्चोक ।
चौतारा साँगाचोकगढी नगरपालिका–१ मा ११ वर्षीया कुनसाङ तामाङलाई मोबाइल चोरीको आरोपमा छिमेकीले तातो झिर, सिस्नो र कुटपिट गरेको घटनाले समुदायलाई स्तब्ध पारेको छ ।
स्थानीय रमेश श्रेष्ठ हाल जिल्ला प्रहरी कार्यालय सिन्धुपाल्चोकमा भान्से पदमा कार्यरत उनकी श्रीमती मंगली श्रेष्ठ तथा छोराहरू सुसन र सुशीलले बालिकालाई बारम्बार पिटेर यातना दिएको पीडित र छिमेकीको बयानमा उल्लेख छ । निरन्तर पिटाइ सहन नसकेपछि बालिका चोरी गरेको स्वीकार गर्न बाध्य भएकी थिइन् । पीडितलाई छिमेकी भाउजुले स्वास्थ्य चौकी पुर्याए पनि तत्काल सहयोग वा कानुनी प्रक्रिया अघि बढेन । वडा कार्यालयले समेत गम्भीरता पूर्वक कदम चाल्न नसकेकाले स्थानीय असन्तुष्ट भएका छन् । छोरीको पीडामा बाबु पासाङ मौन बसेर अर्को दिनै काठमाडौं गएको भन्दै स्थानीयले असन्तोष व्यक्त गरेका छन् । ूबालमैत्री वडाू घोषणा गर्ने तयारी भइरहेका बेला त्यही ठाउँमा बालिकामाथि हिंसा हुनु विडम्बनापूर्ण रहेको उनीहरूको भनाइ छ ।पत्रकारमार्फत् प्रहरीलाई जानकारी गराएपछि श्रेष्ठ परिवारलाई अनुसन्धानका लागि पक्राउ गरिएको छ । स्थानीयले घटनामा संलग्नमाथि कडा कानुनी कारबाही गर्न माग गरेका छन् ।
७ आश्विन २०८२, मंगलवार १९:१२
