जनतापत्र,चौतारा ।

विश्व रेडक्रस दिवसको अवसरमा चौतारा अस्पतालको प्राङ्गणमा रक्त सञ्चार सेवा केन्द्रको उद्घाटन तथा खुला रक्तदान कार्यक्रम सम्पन्न भएको छ। यो कार्यक्रम चौतारा साँगाचोकगढी नगरपालिकाको आयोजनामा नेपाल रेडक्रस सोसाइटी जिल्ला शाखा सिन्धुपाल्चोक, ब्लड डोनर्स एसोसिएसन नेपाल (ब्लोदान) सिन्धुपाल्चोक र चौतारा अस्पतालको सहकार्यमा सम्पन्न भएको हो।कार्यक्रममा नगरप्रमुख कृष्णप्रसाद सापकोटाले केन्द्रको व्यवस्थापन नेपाल रेडक्रस सोसाइटीलाई हस्तान्तरण गर्नुभयो। उहाँले रगत जीवन रक्षाका लागि अत्यन्तै आवश्यक भएको उल्लेख गर्दै आगामी दिनमा सेवा केन्द्रलाई अझ व्यवस्थित र गुणस्तरीय बनाउने प्रतिबद्धता जनाउनुभयो। स्थापित सेवा केन्द्रबाट नागरिकले सहज, व्यवस्थित र भरपर्दो रक्त सेवा प्राप्त गर्ने विश्वास लिइएको छ। उद्घाटन समारोहसँगै आयोजित रक्तदान कार्यक्रममा ५१ जना पुरुष र १८ जना महिला गरी कुल ६९ जनाले स्वेच्छिक रक्तदान गरेका थिए।