जनतापत्र, चौतारा ।
सिन्धुपाल्चोक सदरमुकाम चौतारामा चैत १९–२१ मा बृहत योग शिविर हुन लागेको छ । पतञ्जली योग साधना केन्द्र चौताराको बार्षिकउत्सवको अवसरमा उक्त शिविर हुन लागेको हो । योग समितिले जिल्लाको प्रसिद्धस्थल आमा याङ्ग्रीमा गत मंगलबार योग अभ्यास र मेलम्ची नगर योग समितिको आयोजनामा जिल्लाका साधकहरुले तीन हजार आठ सय मिटरको अग्लो स्थानमा साधना गरि योग साधनाको नवीन रुप प्रदान गरिएको जानकारी दिएको छ ।
पेलम्ची नगरपालिका प्रमुख आइतमान तामाङले र्यटन प्रर्वधनसँगै स्वस्थ जीवनको लागि योगको महत्वको प्रचार गर्न पदयात्रा सफल भएको जानकरी दिनुभएको छ ।
सिन्धुपाल्चोकमा योग तथा ध्यान गर्नेको संङ्ख्या उल्लेख्य बृद्धि भइरहेको छ ।
जिल्ला सदरमुकाम चौतारामा प्रशिक्षण सहित सुरुवात भएको दोस्रो वर्षमा लगभग एक सय बढी सहभागी भएको चौतारा साधना केन्द्रका प्रशिक्षक किरणमान श्रेष्ठले जानकारी दिनुभयो ।
प्रशिक्षणमा सहभागी हुनेको लहर नै लागेको प्रशिक्षक श्रेष्ठले बताउँदै साधना केन्द्रमा दर्जनबढी योग प्रशिक्षक तयार भैसकेका छन् भने सय बढीले साधना गर्ने गरेको जानकारी दिनुभयो ।
पतञ्जली योग समिति सिन्धुपाल्चोकका अध्यक्ष नातीबाबु धितालले जिल्लाका मुख्य वजार केन्द्रमा दैनिक योग तथा ध्यान गर्ने परिपाटीको विकास र जीवनको सुधार नै योग हो भन्ने भाष्य स्थापित हुँदै गएको जानकारी दिनुभयो ।
जिल्लाको चौतारा, साँगाचोक, लामोसाँघु, बाह्रविसे, सुनकोशी, मेलम्चीलगायतका स्थानमा ब्यवस्थित योग साधना केन्द्रहरु संचालन भइरहेका छन् ।
१७ चैत्र २०८१, सोमबार १२:३३
