आइसिँ तामाङ,रसुवा ।
जनैपूर्णिमा अवसरमा गोसाइँकुण्ड पुग्ने तीर्थयात्रीलाई गुणस्तरीय र सर्वसुलभ सेवा सुनिश्चित गर्न होटल व्यवसायीलाई निर्देशन दिइएको छ। जिल्लाका धार्मिक मार्गमा रहेका होटल तथा अस्थायी लजहरूको अनुगमन गरी निर्धारित दररेटमा खाना र बासको व्यवस्था गर्न आग्रह गरिएको जिल्ला अनुगमन समितिले जनाएको छ।
विगतमा यात्रुहरू ठगिएको गुनासो बढेपछि जिल्ला प्रशासन कार्यालयको पहलमा सहायक प्रमुख जिल्ला अधिकारी द्रुवप्रसाद अधिकारीको नेतृत्वमा स्थलगत निरीक्षण गरिएको थियो। स्थायी संरचनाका होटलदेखि थर्कु (अस्थायी छात्रो) सम्मको अनुगमनमा गुणस्तरहीन खाना, अस्वच्छ बसोबास, मूल्यसूचीबिनाको मनोमानी असुली, बिलबिजक नराख्नेजस्ता अनियमितता देखिएको बताइएको छ।
“व्यवसाय सञ्चालन गर्दा उपभोक्ता संरक्षण ऐनको पालना गर्न होटल व्यवसायीलाई कडाइका साथ निर्देशन दिइएको छ,” संयोजक अधिकारीले बताए।
प्रमुख जिल्ला अधिकारी अर्जुन पौडेलको नेतृत्वमा कालोबजारी नियन्त्रण तथा तीर्थयात्रीको सुरक्षालाई ध्यानमा राख्दै सादा पोशाकका प्रहरी पनि परिचालन गरिएको प्रशासनले जनाएको छ।
स्थानीयवासीहरूले प्रशासनको पहललाई सकारात्मक रुपमा लिँदै तीर्थाटन सहज बनाउन यस्ता कदम आवश्यक भएको बताएका छन्।