जनतापत्र,सिन्धुपाल्चोक ।
गरिबी र लाचारीपनको फाइदा उठाउँदै नेपालीहरूको जीवनसँग खेलवाड गर्ने एउटा संगठित अपराधी समूहको गतिविधि उजागर भएको छ। मानव बेचबिखन अनुसन्धान ब्यूरोले सञ्चालन गरेको विशेष अभियान ‘अपरेसन लाइफ फिल्ड’ मार्फत प्रहरीले यस गिरोहका दुई जना मुख्य सदस्यलाई नियन्त्रणमा लिएको छ। पक्राउ परेकामध्ये नाइकेका रूपमा परिचित श्याम कृष्ण भण्डारी र उनका सहयोगी सुजन भारती रहेका छन्। दुवै जनालाई प्रहरीले भारतबाट नेपाल प्रवेश गर्ने क्रममा सीमा नाकाबाटै पक्राउ गरेको हो। अनुसन्धान अनुसार सिन्धुपाल्चोक, काभ्रेपलाञ्चोक, नुवाकोट र धादिङका आर्थिक रूपमा कमजोर मानिसलाई रोजगारी, पैसाको लोभ र अन्य प्रलोभन देखाई भारत लैजाने गरिएको थियो। त्यहाँ पुर्‍याएपछि पीडितलाई नयाँदिल्लीसम्म लगेर मिर्गौला बेच्ने अपराधमा संलग्न गरिएको तथ्य खुलेको छ। प्रहरीका अनुसार अहिलेसम्म पाँच जनाले जाहेरी दिएका छन् भने सोही गिरोहले कम्तीमा चार जना नेपालीको मिर्गौला निकालिसकेको प्रमाण भेटिएको छ। पक्राउ परेकाहरूको बयान र पीडितका कथनले यो अपराध संगठित र व्यापक रूपमा चलिरहेको पुष्टि गरेको छ। मानव बेचबिखन अनुसन्धान ब्यूरोले थप संलग्न व्यक्तिहरूको खोजी जारी रहेको जनाएको छ। साथै, प्रहरीले यस्तो आपराधिक धन्दा रोक्न जनचेतना र सतर्कता बढाउनुपर्नेमा जोड दिएको छ।