जनतापत्र, चौतारा ।
सदरमुकाम चौतारामा खानेपानी प्रशोधन केन्द्र सञ्चालनमा आएको छ । जुगल थालखर्क होल्चे खानेपानी मूल उपभोक्ता तथा सरसफाई समितिले आज (शुक्रबार) बाट गुणस्तरिय खानेपानी प्रशोधन केन्द्र ( ट्रिटमेन्ट प्लान्ट ) सञ्चालनमा ल्याएको हो । यस अघि जुगल थालखर्क होल्चे खानेपानी मूल उपभोक्ता तथा सरसफाई समितिले
खानेपानी व्यवस्थापन र वितरण गरिरहेको थियो । अब चौताराका उपभोक्ताहरुले गुणस्तरिय एवम् स्वच्छ खानेपानी पिउन पाउने भएका हुन् ।

मूलबाट ल्याइएको पानीलाई सिधै दारेगौडास्थित ट्याँकीमा झारेर उपभोक्तालाई वितरण गर्दै आएकोमा अहिले भने प्रशोधन भएर त्यही पानी उपभोक्ताको घरघरमा पुग्नेभएको छ ।
खानेपानी मन्त्री प्रदीप यादवले आज (बिहीबार) सो केन्द्रको उद्घाटन गर्दै खानेपानी योजनाका लागि जनताले तीसप्रतिशत रकम सहलगानी गर्नुपर्ने वाध्यताको अन्त्य गरिने जानकारी दिनुभयो ।
मन्त्री यादवले खानेपानी जस्तो अत्यावश्यक चिजमा जनतालाई तीस प्रतिशत रकम ब्यहोर्न लगाउनु गलत भएको र खरवौंको सडक बनाउँदा सरकारले जनतासँग एक रुपैयाँ पनि अशुल नगर्ने तर खानेपानी आयोजनाका लागि भने सरकारले ७० प्रतिशत मात्र लगानी गर्दै जनतालाई ३० प्रतिशत सहलगानी गराउनु न्यायसंगत नभएको जानकारी दिनुभयो ।
तीसप्रतिशत सहलगानीको निर्देशिका खारेजीका लागि विज्ञसमूहसँग परामर्श गर्ने पनि उहाँको भनाइ रहेको थियो ।

आयोजनाका प्रमुख राजेन्द्रप्रसाद श्रेष्ठलका अनुसार, संघीय खानेपानी तथा ढल व्यवस्थापन आयोजना, भक्तपुरबाट ६ करोड २५ लाख लगानीमा निर्माण भएको हो । प्रशोधन केन्द्रमा प्रतिसेकेण्ड २५ लिटर पानी प्रशोधन हुने छ ।

जुगल थालखर्क होल्चे खानेपानी मूल उपभोक्ता तथा सरसफाइ समितिले सदरमुकाम चौतारा लगायत आसपासका वस्ती गरि झण्डै १४ सय भन्दा बढी घरधुरीका उपभोक्ताले प्रशोधन केन्द्रको पानी उपभोग गर्ने बताएको छ ।

समितिका सचिव श्यामकृष्ण श्रेष्ठको सञ्चालन
गरेको कार्यक्रममा समितिका अध्यक्ष एवम् पूर्व सांसद सुभाष कर्माचार्यको सभापात्वमा भएको भएको थियो ।