क्यौलेठाना आधारभूत विद्यालयमा न्यानो कपडा तथा सामग्री वितरण

जनतापत्र,मेलम्ची सिन्धुपाल्चोक ।
सिन्धुपाल्चोकको जिल्लाको मेलम्ची नगरपालिका–९ स्थित क्यौलेठाना आधारभूत विद्यालयमा विद्यार्थीहरूको लागि न्यानो कपडा, खेलकुद सामग्री तथा शिक्षकहरूका लागि झोला वितरण गरिएको छ। आइतबार विद्यालय परिसरमा गरिएको कार्यक्रममा सामग्री हस्तान्तरण गरिएको हो। न्यानो कपडा हाल अमेरिकामा बसोबास गर्दै आएका शान्त घलेको सहयोगमा उपलब्ध भएको विद्यालयले जनाएको छ। कार्यक्रममा मेलम्ची नगरप्रमुख आइतमान तामाङ प्रमुख अतिथि तथा वडा सदस्य पूर्णबहादुर तामाङ विशेष अतिथि रहे। कक्षा बालविकासदेखि कक्षा ८ सम्मका विद्यार्थीका लागि कपडा वितरण गर्न विद्यालयका पूर्वविद्यार्थी तथा पूर्व व्यवस्थापन समिति सदस्य सचिन तामाङ पाख्रिन र पूर्वशिक्षक आस्मा तामाङ ९पाख्रिन० ले समन्वय गरेका थिए। खेलकुद सामग्री बौद्ध स्पोर्ट्सका सञ्चालक राधिका तामाङ र सुनिल तामाङले उपलब्ध गराएका थिए। विद्यालय व्यवस्थापन समितिका सदस्य सोमाली तामाङको तर्फबाट शिक्षकहरूका लागि झोला वितरण गरिएको थियो। कार्यक्रममा नगरप्रमुख तामाङले सामग्री उपलब्ध गराउने तथा समन्वयमा सहयोग गर्ने व्यक्तिहरूप्रति धन्यवाद व्यक्त गरेका थिए। विद्यालयका प्रधानाध्यापक भरतकुमार मल्लले प्राप्त सहयोगप्रति आभार व्यक्त गर्दै विद्यालयलाई दिइएको साथ आगामी दिनमा पनि आवश्यक रहने जानकारी गराउनु भएको छ । कार्यक्रम विद्यालय व्यवस्थापन समितिका अध्यक्ष पूर्णबहादुर तामाङको अध्यक्षतामा सम्पन्न भएको थियो।

८ मंसिर २०८२, आईतवार १८:२९