जनतापत्र, सिन्धुपाल्चोक । पेट दुखेपछि अस्पताल पुर्याइएकी एक किशोरीले शिशु जन्माएपछि बलात्कारको घटनाबारे पर्दाफास भएको छ। साउन २० गते अस्पताल लगिएकी ती किशोरीले सोही दिन बच्चा जन्माएपछि अस्पतालले प्रहरीलाई जानकारी दिएको थियो।
अस्पतालमा शिशु जन्मिएपछि प्रहरीको टोलीले सोधपुछ गर्दा किशोरीले आफू बलात्कारको सिकार बनेको जानकारी दिएकी हुन्। जिल्ला प्रहरी कार्यालय सिन्धुपाल्चोकका प्रवक्ता माधव खरेलका अनुसार, किशोरीले पटक–पटक जबरजस्ती करणी गरिएको विवरण दिएको बताइएको छ। बयानका आधारमा ५० वर्षीय एक पुरुषलाई पक्राउ गरी अनुसन्धान सुरु गरिएको प्रहरीले जनाएको छ।
प्रहरीका अनुसार किशोरीले सुरुमा आफूमाथि भएको घटनाबारे परिवारलाई समेत केही नबताएको र पेट दुखेपछि मात्रै अस्पताल ल्याइएको खुलासा भएको छ। परिवारले समेत गर्भवती भएको थाहा नपाएको जनाइएको छ।
घटनाको गम्भीरतालाई ध्यानमा राख्दै जिल्ला अदालत सिन्धुपाल्चोकबाट म्याद लिई पक्राउ परेका व्यक्तिमाथि अनुसन्धान अगाडि बढाइएको जिल्ला प्रहरी कार्यालयले जानकारी दिएको छ।
२३ श्रावण २०८२, बिहीबार १३:२२
