जनतापत्र,काभ्रेपलाञ्चोक ।
पनौतीमा रहेको सुरक्षा मुद्रण केन्द्रले शुक्रबारदेखि सवारी चालक अनुमति पत्र लाइसेन्स छपाइ कार्य औपचारिक रूपमा सुरु गरेको छ। सञ्चार तथा सूचना प्रविधि मन्त्री जगदीश खरेलले केन्द्रमा आयोजित कार्यक्रममा बटन थिचेर लाइसेन्स छपाइ कार्यको सुरुआत गर्नुभयो। मन्त्री खरेलले लामो समयदेखि सेवाग्राहीहरू लाइसेन्स नपाएर कागजी प्रमाण लिएर हिँड्नुपर्ने अवस्था अब अन्त्य हुने विश्वास व्यक्त गर्नुभयो। यातायात व्यवस्था विभागका तथ्यांक अनुसार अहिले दैनिक करिब ५ सय थान लाइसेन्स छापिनेछ। केन्द्रले ६ महिनाभित्र बाँकी सबै लाइसेन्स छापेर वितरण गर्ने लक्ष्य लिएको छ। केन्द्रका कार्यकारी निर्देशक देवराज ढुंगानाले कानुनी र प्राविधिक समस्या समाधानपछि छपाइ कार्य नियमित रूपमा अघि बढाइएको जानकारी दिनुभयो। पहिलो चरणमा १२ लाख प्रति छपाइको सम्झौताअनुसार आजदेखि प्रक्रिया सुरु भएको र उत्पादन क्षमता क्रमशः बढाउँदै लैजाने केन्द्रले जनाएको छ।