आइसिँ तामाङ, सिन्धुपाल्चोक ।
काठमाडौं उपत्यकामा पछिल्ला दिनहरूमा बढ्दो आन्दोलन, प्रदर्शन र भिडभाडका कारण देशभर सुरक्षा चुनौती बढिरहेका बेला सिन्धुपाल्चोक जिल्लाको चौतारामा समेत कफ्र्यू जारी गरिएको छ। जिल्ला प्रशासन कार्यालय सिन्धुपाल्चोकले २०८२ भदौ २४ गते राति १० बजेदेखि अर्को आदेश नभएसम्मका लागि जिल्लाभर सभा, जुलुस, प्रदर्शन, कोणसभा तथा भीडभाड पूर्ण रूपमा निषेध गरेको हो।
काठमाडौंमा निरन्तर चर्किँदो आन्दोलन र त्यसको प्रभाव जिल्लामा समेत पर्न सक्ने ठहर गर्दै जिल्ला सुरक्षा समितिको निर्णयअनुसार शान्ति सुरक्षा कायम राख्न निषेधाज्ञा जारी गरिएको प्रमुख जिल्ला अधिकारी बन्धुप्रसाद बास्तोलाले जनाएका छन्।
निषेधाज्ञाअनुसार जिल्लाभर कुनै पनि प्रकारको विरोधसभा, जुलुस, बैठक, धर्ना वा घरघरमै पुगेर गर्ने कोणसभा समेत गर्न नपाइने उल्लेख छ। जिल्ला प्रशासनले सर्वसाधारणलाई संयमित रहन र कानुनको पालना गर्न आग्रह गरेको छ।