जनतापत्र,काठमाडौं ।
राष्ट्रिय परीक्षा बोर्डले कक्षा १२ को पूरक परीक्षा आगामी असोज ७ र ८ गते सञ्चालन गर्ने भएको छ। यसअघि भदौ २८ र २९ गते परीक्षा गर्ने तालिका सार्वजनिक भए पनि देशको वर्तमान अवस्थाका कारण समय तालिका संशोधन गरी बोर्डले नयाँ मिति सार्वजनिक गरेको हो। नयाँ तालिका अनुसार असोज ७ गते अनिवार्य अंग्रेजी ९००४१० विषयको परीक्षा हुनेछ। एक विषय मात्र दिने परीक्षार्थीले सोही दिन परीक्षा दिनुपर्नेछ। दुई विषय दिने परीक्षार्थीका लागि भने सानो कोड नम्बर भएको विषयको परीक्षा सोही दिन हुनेछ। अनिवार्य अंग्रेजी र अनिवार्य नेपाली दुवै विषयमा पूरक परीक्षा दिने विद्यार्थीले पहिलो दिन अंग्रेजी र दोस्रो दिन नेपाली विषयको परीक्षा दिनुपर्नेछ।
असोज ८ गते दुई विषय दिने परीक्षार्थीका लागि ठूलो कोड नम्बर भएको विषयको परीक्षा सञ्चालन हुनेछ। बोर्डका अनुसार त्यस दिन अनिवार्य अंग्रेजी विषयको परीक्षा भने सञ्चालन हुने छैन।
परीक्षा तालिका सार्वजनिकसँगै बोर्डले यसअघि नै परीक्षा केन्द्र निर्धारण गरिसकेको र परीक्षा निर्धारित समयमा नै हुने स्पष्ट पारेको छ।