जनतापत्र, काठमाडौँ — नेकपा एमालेको ११औं महाधिवेशन पाँच साताभित्र काठमाडौँमा हुने भएको छ। पार्टीले मङ्सिर १३ गते एकैदिन प्रतिनिधिहरूको छनोट गर्ने र मङ्सिर २७ देखि २९ गतेसम्म महाधिवेशन सञ्चालन गर्ने तयारी गरेको छ। यस महाधिवेशनमा सहभागी हुने प्रतिनिधिहरूको संख्या २ हजार १२७ रहने एमालेले जनाएको छ।
पार्टीले जारी गरेको पछिल्लो अन्तर पार्टी निर्देशन (अपानि) अनुसार प्रतिनिधि छनोटका मापदण्ड र क्लस्टर निर्धारण गरिएको छ। पार्टी सदस्य संख्या अनुसार भूगोल, वर्ग, लैङ्गिक र संगठनका आधारमा प्रतिनिधित्व हुने व्यवस्था गरिएको छ। केन्द्रीय कार्यालय सचिव डा. भीष्म अधिकारीका अनुसार सबै क्षेत्रबाट प्रतिनिधित्व सुनिश्चित गर्न विस्तृत मापदण्ड जिल्ला कमिटीहरूलाई पठाइएको छ।
अपानिअनुसार केन्द्रीय कमिटी, तीन आयोग र सल्लाहकार परिषद् गरी ४६४ जना प्रतिनिधि रहनेछन्। त्यसमध्ये केन्द्रीय कमिटीबाट ३५५, अनुशासन आयोगबाट २९, निर्वाचन आयोगबाट ३०, लेखा आयोगबाट २५ र सल्लाहकार परिषद्बाट २५ जना प्रतिनिधि हुनेछन्। प्रदेशस्तरका कमिटीबाट पाँच जनाका दरले ४५ जना सहभागी हुनेछन्।
सबैभन्दा ठूलो क्लस्टर भूगोल हो। १६५ संघीय निर्वाचन क्षेत्रबाट समावेशी सिद्धान्तअनुसार १,१३५ जना प्रतिनिधि आउने छन्। हरेक क्षेत्रमा न्यूनतम १,२०० सदस्य बराबर एक जना युवा, एक महिला सहित चारजना प्रतिनिधि हुनेछन्। सदस्य संख्या बढे अनुसार थप प्रतिनिधि चयन गरिने व्यवस्था छ।
विशेष जिल्लाबाट करिब ४७ जना, दलित आरक्षण क्लस्टरबाट ८१ जना, श्रमिकबाट ४९ जना र प्रवास कमिटीहरूबाट ३५ जना प्रतिनिधि हुने छन्। केन्द्रीय विभागहरूबाट ३२ जना र केन्द्रीय कार्यालयबाट एक जना प्रतिनिधि चयन हुनेछन्।
त्यस्तै, २३ वटा जनसंगठनबाट १३७ जना प्रतिनिधि महाधिवेशनमा सहभागी हुने व्यवस्था छ। अनुसूची एक अन्तर्गतका महासंघीय संरचनाबाट सातजना र अनुसूची दुई अन्तर्गतका जनसंगठनबाट पाँच जना प्रतिनिधि चयन गरिनेछ।
यी सबै मिलाएर निर्वाचित प्रतिनिधि २,०२६ जना हुने र विधानअनुसार कुल प्रतिनिधिको पाँच प्रतिशत अर्थात् १०१ जना मनोनीत गरिने पार्टीले जनाएको छ। यसरी ११औं महाधिवेशनमा कुल २ हजार १२७ जना प्रतिनिधि सहभागी हुने एमालेले पुष्टि गरेको छ।
२१ कार्तिक २०८२, बिहीबार १३:५३
