जनतापत्र, सिन्धुपाल्चोक ।
सूर्यदेवप्रति श्रद्धा र भक्तिपूर्वक पूजा आराधना गरी मनाइने छठ पर्व आज बिहान उदाउँदो सूर्यलाई अर्घ दिइ सम्पन्न गरिएको छ। बिहानैदेखि भक्तजनहरू नदी, तलाउ तथा पोखरी किनारमा जम्मा भई पूजा आराधनासहित गाईको दूध, फूल र जलले अर्घ्य अर्पण गरे। धार्मिक विश्वास अनुसार सूर्यदेव र जलदेवीको संयुक्त आराधनाका रूपमा छठ पर्व मनाइन्छ। पृथ्वीमा रहेका सम्पूर्ण जीवको जीवन चक्र सूर्य र जलबाट सञ्चालन हुने मान्यताअनुसार नदीलाई ‘माता’ र सूर्यलाई ‘सम्पूर्ण शक्तिको स्रोत’ मानी विशेष पूजा गर्ने प्रचलन रहेको छ। छठ पर्वको अन्तिम दिन कार्तिक शुक्ल सप्तमीका बिहान उदाउँदो सूर्यलाई अर्घ्य अर्पण गरेपछि पर्व विधिपूर्वक सम्पन्न हुने धार्मिक परम्परा रहेको छ। भक्तजनहरू लुगासहित कम्मरसम्म पानीमा डुबेर सूर्यको दर्शन गर्ने विधि अनुसार पूजा गर्छन्। यसरी बिहानै घाटमा गरिने पूजालाई ‘भिन्सरघाट’ भनिन्छ, जहाँ हजारौं भक्तजनहरूले आस्था र विश्वासका साथ सूर्यदेवलाई अर्घ्य अर्पण गरी छठ पर्व सम्पन्न गरेका छन्।