आइसिँ तामाङ,इन्द्रावती सिन्धुपाल्चोक ।
सिन्धुपाल्चोकको इन्द्रावती गाउँपालिका–२, बाहुन्नेबेसीमा गएको पहिरोले स्थानीय चेतकुमारी आचार्य, राजु आचार्य र गंगा आचार्यको घर जोखिममा परेका छन्।स्थानीय वर्ष ७९ की चेतकुमारी आचार्यको एकतले पक्की घरको छेउबाट पहिरो गएको र त्यसको जोखिममा नजिकै रहेका राजु आचार्यको दुईतले र गंगा आचार्यको एकतले पक्की घर पनि परेका छन्।
इलाका प्रहरी कार्यालय नवलपुरले दिएको जानकारीअनुसार, पहिरोको जोखिम बढेपछि स्थानीय जनप्रतिनिधिहरूको समन्वयमा तीनै घरमा बसोबास गर्दै आएका १४ जनालाई सुरक्षित स्थानमा सारिएको छ। चेतकुमारीको घरबाट पाँच, राजुको घरबाट चार र गंगाको घरबाट पाँच जना गरी १४ जनालाई चौतारा साँगाचोकगढी नगरपालिका–६ मा रहेको रेशमबहादुर आचार्यको घरमा स्थानान्तरण गरिएको प्रहरीले जनाएको छ।
अझै पनि वर्षा भइरहेकाले पहिरोको जोखिम कायम रहेको भन्दै स्थानीय प्रशासनले त्यस क्षेत्रमा विशेष निगरानी गरिरहेको छ।