चौतारा सिन्धुपाल्चोक ।

मेलम्चीस्थित इन्द्रावती क्याम्पसको १८औँ वार्षिकोत्सव तथा क्याम्पस सभा शुक्रबार विभिन्न कार्यक्रमसहित सम्पन्न भयो। कार्यक्रममा मेलम्ची नगरप्रमुख आइतमान तामाङ प्रमुख अतिथि र उपप्रमुख उमा प्रधान विशेष अतिथि रहे।कार्यक्रममा नगरप्रमुख तामाङले क्याम्पसले स्थानीय युवालाई घरमै उच्च शिक्षा हासिल गर्ने अवसर विस्तार गरेको उल्लेख गर्दै यस संस्थाले नगरको शैक्षिक पहिचान मजबुत बनाएको बताए। शिक्षा गुणस्तर, सीप तथा डिजिटल पहुँच बढाउने काममा नगरपालिकाले निरन्तर सहकार्य गरेको र आगामी दिनमा थप मजबुत साझेदारी आवश्यक रहेको उनले बताए।उपप्रमुख प्रधानले क्याम्पसले समुदायमुखी शिक्षाको विस्तारमा पुर्‍याउँदै आएको भूमिकाको सराहना गर्दै विद्यार्थीलाई अनुशासन, जिम्मेवारी र सामाजिक चेतका साथ अघि बढ्न आग्रह गरिन्।क्याम्पस प्रमुख राधाकृष्ण श्रेष्ठले विगत वर्षको शैक्षिक तथा वित्तीय प्रतिवेदन प्रस्तुत गर्दै नयाँ सत्रमा अनुसन्धानमुखी अध्ययन, पाठ्यक्रम सुदृढीकरण र विद्यार्थी केन्द्रित कार्यक्रमलाई प्राथमिकतामा राखिने जानकारी दिए।क्याम्पस व्यवस्थापन समिति अध्यक्ष महेश दुलाल (सिपी) को अध्यक्षतामा सम्पन्न भएको कार्यक्रम क्याम्पसको शैक्षिक विकासमा साझा प्रतिबद्धता व्यक्त गर्दै समापन भएको क्याम्पसले जनाएको छ।