जनतापत्र,सिन्धुपाल्चोक ।
आगामी निर्वाचन नजिकिँदै जाँदा सुरक्षा संवेदनशीलता बढेकाले सुरुदेखिनै सेना, सशस्त्र प्रहरी र नेपाल प्रहरीलाई एकीकृत रूपमा परिचालन गर्न तयारी थालिएको छ । निर्वाचन आयोग र सुरक्षा निकायका उच्च अधिकारीबीच शुक्रबार बसेको बैठकमा मतदाता, दल र निर्वाचन कर्मचारीलाई सुरक्षित वातावरण प्रदान गर्न छिट्टै एकीकृत सुरक्षा योजना लागू गर्नुपर्ने सुझाव आएको हो । आयोगका पदाधिकारीले विगतमा जस्तै अन्तिम साता होइन, प्रारम्भदेखि नै सबै सुरक्षा निकायलाई समन्वयात्मक ढंगले खटाउनुपर्ने आवश्यकता औंल्याएका छन् । कार्यवाहक प्रमुख निर्वाचन आयुक्त रामप्रसाद भण्डारीका अनुसार मतदानअघि, मतदानको दिन र त्यसपछि पनि समान रूपमा प्रभावकारी सुरक्षा व्यवस्थापन हुने गरी विस्तृत योजना तयार पारिँदैछ । आयोगका प्रवक्ता नारायणप्रसाद भट्टराईले स्वच्छ, निष्पक्ष र भयरहित वातावरणमा निर्वाचन सम्पन्न गर्न सुरक्षासम्बन्धी तयारी तीव्र गतिमा अघि बढेको जानकारी दिएका छन् ।
हालैका प्रदर्शनका कारण प्रहरीको मनोबलमा परेको असरलाई ध्यानमा राख्दै बैठकले सुरुदेखि नै सशस्त्र प्रहरी र सेनाको पनि फिल्ड स्तरमा उपस्थिति आवश्यक रहेको निष्कर्ष निकालेको छ । निर्वाचन आयुक्त सगुनशमशेर जबराले नागरिकमा सुरक्षाप्रतिको विश्वास कायम राख्न र निकायबीच आपसी समन्वय सुदृढ गर्न सरकारलाई चाँडै एकीकृत सुरक्षा योजना कार्यान्वयनमा ल्याउन सुझाव दिने बताएका छन् ।