आइसिँ तामाङ,धुलिखेल काभ्रे ।

अरनिको राजमार्ग अन्तर्गत खावा र धुलिखेल जोड्ने सडकखण्डमा सुख्खा पहिरो खस्दा यातायात पूर्णरूपमा अवरुद्ध भएको छ। धुलिखेल नगरपालिका–८, ठकुरीगाउँको चन्द्राडाँडामा बिहीबार बिहान १० बजेतिर खसेको सुख्खा पहिरोले सडक अवरुद्ध भएको हो। अचानक खसेको पहिरोका कारण सडकको दुवैतर्फ ठूलो संख्यामा गाडी र यात्रु रोकिएका छन्। यसले गर्दा काठमाडौँबाट बाहिरिने र भित्रिने सवारी साधनहरू अलपत्र परेका छन्। जिल्ला प्रहरी कार्यालय काभ्रेका प्रहरी प्रमुख, प्रहरी उपरीक्षक कोमल शाहले जानकारी दिएअनुसार पहिरो हटाउनका लागि आवश्यक समन्वय भइरहेको छ। पहिरो हटाउन केही समय लाग्ने भएकाले वैकल्पिक मार्ग प्रयोग गर्न पनि सुझाव दिएका छन्। पहिरो खसेको स्थानमा अहिले सुरक्षाकर्मीहरू परिचालन गरिएको छ। उनीहरूले पहिरो हटाउने कार्यलाई द्रुत गतिमा अगाडि बढाउने प्रयास गरिरहेका छन्।
यो सडकखण्ड अरनिको राजमार्गको एक महत्त्वपूर्ण भाग भएकाले यसको अवरोधले सर्वसाधारण र विशेष गरी चाडपर्वका बेला यात्रा गर्ने यात्रुहरूलाई निकै असुविधा भएको छ।