सुनिता रखाल, चौतारा ।
चौतारा साँगाचोकगढी नगरपालिका र अपाङ्ग बाल अस्पताल तथा पुनस्थापना केन्द्र बनेपाको आयोजनामा अपाङ्गता परिचय पत्र बितरण सहितको घुम्ती शिविर सम्पन्न भएको छ ।
शुक्रबार साँगाचोक आधारभुत स्वास्थ्य संस्थामा र शनिबार चौतारा अस्पतलमा अपाङ्गता पहिचान , स्वास्थ्य तथा पुनस्थापना र अपाङ्गता परिचय पत्र बितरण सहितको घुम्ती शिविर सम्पन्न भएको हो । चौतारा साँगाचोकगढी नगरपालिका र अपाङ्ग बाल अस्पताल तथा पुनस्थापना केन्द्र बनेपाको आयोजनामा भएको शिविरबाट २ सय ५८ जनाले सेवा लिएका थिए ।
सप्रोस नेपालका पैरविकर्ता सुजन पराजुलीका अनुसार २ दिन संचालन भएको शिविरबाट २३ जना अपाङ्गता भएका ब्यक्तिलाई हृविलचियर, बैसाखी , वार्कर , सेतो छडी लगायतका सहायक सामाग्री बितरण गरिएको छ । शिविरबाट आवश्यकताको आधारमा कृतिम खुट्टाको मापन लिएको र पछि वितरण गरिने छ ।
यसैगरी शिविरबाट ४४ जनाको अपाङ्गता पहिचान संगै परिचय पत्र वितरण गरीएको छ भने १ सय ९१ जनाको स्वास्थ्य परीक्षण गरिएको छ । शिविरबाट परामर्श सेवा समेत प्रदान गरिएको थियो ।
नगरपालिकाको बिभिन्न ठाउँबाट आएका पूर्ण अशक्त अपाङ्गहरूको लागि लक्षित गरेर आगामी दिनमा वडा सम्म पुगेर सेवा दिने योजना रहेको चौतारा साँगाचोकगढी नगरपालिका उपप्रमुख सिता थापाले बताइन् । नगर अपाङ्ग समन्वय समिति, महिला आत्मनिर्भरता केन्द्र, फेयर मेड, सप्रोस नेपाल, चौतारा अस्पताल र बौद्धिक अपाङ्गता अभिभावक संघ जस्ता निकायहरुको सहयोग तथा समन्वयमा शिविर सम्पन्न गरिएको हो ।

यसैबीच सप्रोस नेपालले असोज दोश्रो साताकोवाढी पहिरोपछि गरीएको सर्वेक्षणबाट पहिचान भएका नगरपालिका भित्रका ८ जना विपन्न परिवारलाई क्षतिको आधारमा नगद ३० हजार र ५० हजार उपलब्ध गराएको छ ।