जनतापत्र,म्याग्दी ।

सशस्त्र प्रहरी बलले म्याग्दीको अन्नपूर्ण बेस क्याम्पबाट आज बिहानसम्म १ सय ६२ जना आन्तरिक तथा विदेशी पर्यटकको सफलतापूर्वक उद्धार गरेको छ। अब बेस क्याम्पमा कुनै पनि पर्यटक बाँकी छैनन्। सशस्त्र प्रहरीका सह–प्रवक्ता शैलेन्द्र थापाका अनुसार बाक्लो हिमपातका कारण जोखिममा परेका र बाटो पत्ता लगाउन नसकी अलपत्र परेका पर्यटकहरूलाई डोरीको सहायताले बाटो पहिल्याउँदै उद्धार गरिएको हो। उद्धारपछि सबैलाई अन्नपूर्ण गाउँपालिका–४ गुफाफाँट, सादिखर्कलगायत हिमपात नभएका सुरक्षित स्थानमा ल्याइएको छ। सशस्त्र प्रहरी बल नेपाल विपद् व्यवस्थापन बेस नारच्याङ म्याग्दीबाट कार्तिक ११ गते उद्धारका लागि प्रहरी निरीक्षक बिनोद पौडेलको कमान्डमा टोली बेस क्याम्पतर्फ गएको थियो। सो टोलीले १७ जना विदेशीसहित १ सय ६२ जनाको उद्धार गरेको हो। तीन दिनदेखि जारी उद्धार कार्य अन्तर्गत बुधवार मात्रै ५२ जना पर्यटकलाई बेस क्याम्पबाट र बाटो बिराएर अलपत्र परेका २० जनालाई सुरक्षित स्थानमा ल्याइएको थियो। थापाका अनुसार उद्धार गरिएका केहीमा श्वासप्रश्वाससम्बन्धी सामान्य समस्या देखिए पनि गम्भीर स्वास्थ्य समस्या भने छैन। सबैलाई सुरक्षित स्थानमा राखिएको र अवस्था सामान्य रहेको बताइएको छ।