आइसिँ तामाङ,चौतारा सिन्धुपाल्चोक  ।

सिन्धुपाल्चोकमा सक्रिय विद्यार्थी संगठन अनेरास्ववियुले विहिबार प्रमुख जिल्ला अधिकारी बन्धु प्रसाद बास्तोलालाई एक महत्वपूर्ण ज्ञापनपत्र बुझाउँदै जिल्लामा भइरहेका विविध जनसरोकारका विषयहरूमा ध्यानाकर्षण गराएको छ।
ज्ञापनपत्रमा उल्लेख गरिएअनुसार, यातायात व्यवसायीहरूले कानुनले व्यवस्था गरेको ४५ प्रतिशत भाडा छुट लागू नगरेको विषयलाई प्रमुख एजेण्डा बनाइएको छ। संगठनले विद्यार्थी, जेष्ठ नागरिक, अपाङ्ग तथा शारीरिक रूपमा असक्त नागरिकहरूका लागि व्यवस्था गरिएको भाडा सहुलियत व्यवहारमा लागू गरिनु पर्ने माग राखेको छ।
त्यस्तै, अरनिको यातायातले सुकुटेदेखि बाह्रबिसेसम्म सञ्चालन गर्न प्रतिबद्ध क्याम्पस टिप सेवा अझै कार्यान्वयनमा ल्याउन नसकेको भन्दै कडा आपत्ति जनाइएको छ। ज्ञापनपत्रमा निजी विद्यालयहरूद्वारा नियमबमोजिम छात्रवृत्ति नदिइएको र शिक्षकहरूलाई तोकिएको सेवा सुविधा नपु¥याइएको विषयलाई गम्भीरतापूर्वक लिएर नियमित निरीक्षण तथा अनुगमन गर्न प्रशासनसँग अनुरोध गरिएको छ। वर्षायामसँगै आउने विपद् जोखिम, उद्धार र राहत व्यवस्थापनमा तत्काल कार्ययोजना निर्माण गर्नुपर्ने माग पनि ज्ञापनपत्रमा छ। साथै, नदी दोहनका कारण वस्तीहरूमा बाढी र क्षतिको जोखिम बढेको भन्दै नियमविपरीतको उत्खनन रोकेर कडा कारबाही गर्नुपर्ने संगठनको आग्रह छ।
संगठनका इञ्चार्ज चरि बहादुर तामाङका अनुसार अनेरास्ववियु अहिले जिल्ला संगठन सुदृढीकरण अभियानमा जुटिरहेको छ।
हालै सम्पन्न स्ववियु निर्वाचनमा संगठनले जिल्लामा पहिलो स्थान हासिल गर्दै प्रभावशाली उपस्थिति जनाउन सफल भएको हो।
शैक्षिक संस्थामा प्रारम्भिक कमिटी गठन, पुर्नगठन, बैठक र प्रशिक्षण कार्यक्रमहरू तीव्र गतिमा अघि बढिरहेका छन्।