जनतापत्र,काठमाडौँ ।
अबदेखि अनलाइन सञ्चारमाध्यम दर्ता र नवीकरण गर्न शुल्क तिर्नुपर्ने भएको छ । सरकारले छापाखाना तथा प्रकाशनसम्बन्धी नियमावली संशोधन गर्दै अनलाइन सञ्चारमाध्यमको दर्ता र नवीकरणमा शुल्क व्यवस्था लागू गरेको हो । नयाँ व्यवस्थाअनुसार अनलाइन सञ्चारमाध्यम दर्ताका लागि रु। ५,००० शुल्क तोकिएको छ भने हरेक आर्थिक वर्षमा नवीकरण गर्दा रु। २,५०० शुल्क तिर्नुपर्नेछ । यसअघि अनलाइन सञ्चारमाध्यम दर्ता र नवीकरण प्रक्रिया निःशुल्क रूपमा सञ्चालन हुँदै आएको थियो । संशोधित नियमावलीले अब अनलाइनसहितका पत्रपत्रिका तथा अन्य प्रकाशनहरूको दर्ता र नियमन कार्य जिल्ला प्रशासन कार्यालयबाट हटाएर सूचना तथा प्रसारण विभागमार्फत हुने व्यवस्था गरेको छ । बुधबार बसेको मन्त्रिपरिषद्को बैठकले सो निर्णय गरेको हो । सोही निर्णयअनुसार सञ्चार तथा सूचना प्रविधि मन्त्रालयले नेपाल राजपत्रमा सूचना प्रकाशित गर्दै संशोधित नियमावली तत्काल कार्यान्वयनमा ल्याएको छ ।