जिल्लाका पर्यटकीय क्षेत्र सुकुटेमा पहिलो पटक राष्ट्रियस्तरको ‘बिच’ भलिबल प्रतियोगिता हुने भएको छ । आगामी माघ १ देखि ५ गतेसम्म सञ्चालन हुने यस प्रतियोगितामा पुरुष र महिलातर्फ फरक–फरक खेल हुनेछ ।
सिन्धु सुकुटे पर्यटन ब्यबसाय संघ र जिल्ला भलिबल संघ सिन्धुपाल्चोकको संयुक्त आयोजनामा ७ औं महिला तथा ८ औं पुरुष राष्ट्रिय बीच भलिबल प्रतियोगिता हुन लागेको हो ।

काठमाण्डौं, भृकुटीमण्डपस्थित पर्यटन बोर्डको सभाहलमा आयोजक संस्थाले सोमबार पत्रकार सम्मेलन तथा सम्झौता कार्यक्रम गर्दै सुकुटेमा बीच भलिबल प्रतियोगिता बारे सार्वजनिक गरेको हो ।
सिन्धु सुकुटे पर्यटन ब्यवसायी संघका अध्यक्ष महेन्द्रसिं थापाले पर्यटकीय नगरी सुकुटेलाई खेल पर्यटनमार्फत थप पहिचान र प्रचारप्रसारका लागि टेवा पुग्ने बताए ।
सात प्रदेशका एक पुरुष र एक महिला खेलाडी गरि १४ जना र विभागीय समूह नेपाली सेना, नेपाल प्रहरी र सशस्त्र प्रहरीबाट एक महिला र एक पुरुष गरी ६ जना खेलाडीको सहभागि हुने राष्ट्रिय भलिबल संघका अध्यक्ष जितेन्द्रबहादुर चन्दले वताए ।