जनतापत्र, सिन्धुपाल्चोक ।
सिन्धुपाल्चोक जिल्लामा नागरिकलाई सहज र सुलभ रूपमा प्रशासनिक सेवा उपलब्ध गराउने उद्देश्यले मेलम्ची र बाह्रबिसेमा इलाका प्रशासन कार्यालय स्थापना गर्ने प्रस्ताव अगाडि बढाइएको छ। पूर्वमन्त्री तथा संविधानसभा सदस्य शेरबहादुर तामाङको पहलमा सम्बन्धित मन्त्रालयहरूसँग समन्वय गर्दै प्रस्ताव प्रक्रिया अघि बढाइएको हो।
पूर्वमन्त्री तामाङले गृह मन्त्रालयमार्फत मन्त्रिपरिषद्मा प्रस्ताव लैजाने तयारी भइरहेको जानकारी दिएका छन्। उनका अनुसार सिन्धुपाल्चोकको भौगोलिक बनावट, सेवाग्राहीको पहुँच र वर्तमानको सेवा प्रवाहको अवस्थालाई दृष्टिगत गर्दै दुई स्थानमा इलाका प्रशासन कार्यालयको आवश्यकता देखिएको छ।
उनले मेलम्चीमा प्रस्तावित इलाका प्रशासन कार्यालयबाट हेलम्बु गाउँपालिका, पाँचपोखरी थाङपाल गाउँपालिका, मेलम्ची नगरपालिका र इन्द्रावती गाउँपालिकाका वडा नं ४ देखि १२ सम्म सेवा दिन सकिने उल्लेख गरेका छन्।
त्यस्तै, बाह्रबिसेमा स्थापना गरिने अर्को कार्यालयबाट भोटेकोशी गाउँपालिका, बाह्रबिसे नगरपालिका, त्रिपुरासुन्दरी गाउँपालिका, लिसाङ्खुपाखर गाउँपालिका, बलेफी गाउँपालिकाको वडा नं ८ र सुनकोशी गाउँपालिकाको वडा नं ६ र ७ मा सेवा दिने व्यवस्था मिलाइनेछ।
हाल स्थानीय जनताले प्रशासनिक सेवाका लागि लामो दूरी यात्रा गर्नुपर्ने बाध्यता रहेको भन्दै, तामाङले यस प्रस्तावले जनताको सेवा प्रवाह सहज बनाउने विश्वास व्यक्त गरेका छन्। स्थानीय पालिकाहरू र जिल्ला सुरक्षा समितिको सिफारिसमा अर्थ मन्त्रालयको सहमति प्राप्त गरी गृह मन्त्रालयमार्फत मन्त्रिपरिषद्को निर्णयबाट कार्यालय स्थापना प्रक्रिया अघि बढाइने जानकारी दिइएको छ।
२३ असार २०८२, सोमबार १९:३०
