जनतापत्र, काठमाडौँ, – नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले पार्टीका सबै नेताका छोराछोरीलाई स्वदेशको सार्वजनिक विद्यालय वा कलेजमा पढाउने तयारी भइरहेको बताएका छन्।

अखिल (क्रान्तिकारी) द्वारा आयोजित शैक्षिक संवाद कार्यक्रममा बोल्दै उनले पार्टीले चाँडै यस्तो निर्णय लिन लागेको जानकारी दिए। उनका अनुसार स्थानीय सरकार प्रमुखहरूका छोराछोरीलाई सार्वजनिक विद्यालयमा अनिवार्य रूपमा पढाउने निर्णय कार्यान्वयनमा आइसकेको छ। अब केन्द्रका नेताका छोराछोरीसमेत विदेश पढ्न नपाउने गरी निर्णय हुने तयारी भइरहेको हो।

प्रचण्डले आफू पार्टीको अध्यक्षको रूपमा उदाहरण प्रस्तुत गर्दै भने, “मेरा छोराछोरी विदेश पढ्न गएका छैनन्। हामी सबैले सार्वजनिक विद्यालयलाई प्राथमिकता दिनुपर्छ भन्ने सोच बनाउँदैछौँ।”

उनले पछिल्लो समय सार्वजनिक शिक्षामा आम नागरिकको विश्वास घट्दै गएको सन्दर्भमा नेताहरूले नै उदाहरणीय भूमिका खेल्नुपर्नेमा जोड दिए।

यस निर्णयबाट नेताहरूका छोराछोरी पनि अब आम जनताका सन्तानझैँ स्वदेशकै सरकारी विद्यालय र कलेजमा अध्ययन गर्नुपर्ने बाटो खुल्ने देखिएको छ। पार्टीले चाँडै नै औपचारिक रूपमा यसबारे निर्णय लिने तयारी गरेको जनाइएको छ।