आइसिँ तामाङ मेलम्ची सिन्धुपाल्चोक ।

परम्परागत कृषि पद्धतिमा आधारित जैविक उत्पादन प्रवर्द्धनका लागि मेलम्ची नगरपालिकाले चालु आर्थिक वर्ष २०८१÷८२ मा २४० जना हलगोरु पाल्ने कृषकलाई प्रोत्साहनस्वरूप नगद अनुदान प्रदान गरेको छ।
नगरपालिकाका प्रमुख आइतमान तामाङका अनुसार आधुनिक कृषि प्रविधिको विकाससँगै हराउँदै गएको गोरु पालन संस्कृतिको संरक्षण र प्रोत्साहनका लागि प्रति हलगोरु ५ हजार रुपैयाँका दरले अनुदान उपलब्ध गराइएको हो।
कृषि विकास शाखा प्रमुख अमरनाथ आचार्यले कृषकलाई अनिवार्य पशु बिमा गराउनु पर्ने व्यवस्था गरिएको जानकारी दिए। “बिमा गरिएका तर बैंक खाता नखोलेका किसानलाई पनि आवश्यक प्रक्रिया पूरा गरेर रकम बुझाइएको छ ।
नगर उपप्रमुख उमा प्रधानले गोरु पालनबाट प्राङ्गारिक मल उत्पादन, माटोको उर्वराशक्ति सुधार तथा जैविक विविधताको संरक्षणमा सकारात्मक योगदान पुग्ने विश्वास व्यक्त गरिन्।
मेलम्ची नगरपालिकाले ग्रामीण कृषि प्रणालीलाई संरक्षण गर्दै आधुनिक दृष्टिकोणका साथ किसानलाई आत्मनिर्भर बनाउन यो कार्यक्रमलाई निरन्तरता दिने जनाएको छ।