जनतापत्र,काठमाडौं – नेपालमा मनसुनी वायु सक्रिय रहँदा आज देशका धेरै भागमा वर्षा हुने देखिएको छ। मौसम पूर्वानुमान अनुसार मनसुनको न्यून चापीय रेखा अहिले नेपालको तराई क्षेत्रमा रहेको छ, जसको प्रभावले कोशी, मधेस, बागमती र गण्डकी प्रदेशमा सामान्य बदली र अन्य क्षेत्रमा आंशिक बदलीको अवस्था छ।

आज दिउँसो लुम्बिनी, कर्णाली र सुदूरपश्चिम प्रदेशका पहाडी तथा तराई भूभागमा धेरै स्थानमा वर्षा हुने सम्भावना छ। साथै, देशका अन्य पहाडी भागका केही स्थानमा र मधेस तथा अन्य तराई भूभागका थोरै स्थानमा पनि वर्षा हुने अनुमान छ। लुम्बिनी प्रदेशको तराई, कोशी, कर्णाली र सुदूरपश्चिमका पहाडी भूभागका एक–दुई स्थानमा भारी वर्षा हुने सम्भावना पनि छ।

आज राति देशभर सामान्य बदली रहनेछ। कोशी, मधेस, बागमती र गण्डकी प्रदेशका पहाडी भागका केही स्थानमा र अन्य प्रदेशका पहाडी तथा तराई भूभागका थोरै स्थानमा मध्यम वर्षा हुने देखिएको छ। कोशी र बागमतीका पहाडी भूभागका एक–दुई स्थानमा भने भारी वर्षा हुन सक्ने अनुमान गरिएको छ।

मौसम विभागले कोशी, बागमती, लुम्बिनी, कर्णाली र सुदूरपश्चिमका पहाडी भूभागमा भारी वर्षा हुने सम्भावना रहेकाले पहिरो, बाढी तथा पानीजन्य जोखिमबाट बच्न सतर्क रहन सबैलाई आग्रह गरेको छ।