जनतापत्र, सिन्धुपाल्चोक । नेपाल कम्युनिष्ट पार्टी (एमाले) चौतारा साँगाचोकगढी नगर कमिटी र नेपाली कांग्रेस चौतारा साँगाचोकगढी नगर कार्यसमितिले शिक्षा क्षेत्रको समग्र हितलाई ध्यानमा राख्दै चौतारा बहुमुखी क्याम्पसको स्वतन्त्र बिध्यार्थी युनियनको निर्वाचन र जिल्लाको जेठो शिक्षण संस्था कृष्ण रत्न गंगा माध्यमिक विद्यालयको व्यवस्थापन समिति निर्वाचनमा सहकार्य गर्ने निर्णय गरेका छन्।

दुवै दलले विद्यालयको हित र शिक्षाको गुणस्तर सुधार गर्ने उद्देश्यसहित संयुक्त रूपमा उम्मेदवार समर्थन गर्दै आगामी निर्वाचनमा सक्रिय रूपमा सहभागी हुने घोषणा गरेका छन्। यस सन्दर्भमा चौतारा बहुमुखी क्याम्पसमा हुने स्वतन्त्र विद्यार्थी युनियन (स्ववियु) निर्वाचनमा अध्यक्ष पदका लागि एमाले निकट अनेरास्ववियुका उमेदवार सुशिल तामाङ र कांग्रेस निकट नेबिसघका सचिब पदका उमेदवार चिनलाल तामाङको नेतृत्वमा रहेको संयुक्त प्यानललाई अत्यधिक मतले विजयी गराउन अपिल गरिएको छ।

यसैगरी, श्री कृष्ण रत्न गंगा माध्यमिक विद्यालय व्यवस्थापन समिति निर्वाचनमा पनि दुवै दलले साझा उम्मेदवारलाई तय गरेका छन । यस क्रममा, विद्यालय व्यवस्थापन समितिका उम्मेदवार निमेष श्रेष्ठ (अध्यक्ष), बिन्दा पुरी (सदस्य), निमा ग्याल्मो लामा (सदस्य) र लजीता श्रेष्ठ (सदस्य) लाई मत प्रदान गरी विजयी गराउन मतदाताहरुलाई अनुरोध गरिएको छ।

साझा विज्ञप्तिमा हस्ताक्षर गर्दै एमाले नगर अध्यक्ष दिपक नेपाल र नेपाली कांग्रेस नगर सभापति इन्द्रेचन धितालले विद्यालयको शिक्षण गुणस्तर सुधारमा दीर्घकालीन सहकार्य गर्ने प्रतिवद्धता व्यक्त गरेका छन्।