जनतापत्र, काठमाण्डौं ।
बालबालिकाको सिर्जनशीलता र कला अभिव्यक्तिलाई प्रोत्साहन गर्ने उद्देश्यले नव अरुणिमा माध्यमिक विद्यालय, आरुबारीमा आयोजित अरुणिमा–रमेश विकल अन्तर विद्यालय स्थलगत बाल चित्रकला प्रतियोगिता–२०२५ शनिबार उत्साहपूर्ण वातावरणमा सम्पन्न भएको छ। प्रतियोगितामा काठमाडौं उपत्यकाभरका ३१ विद्यालयका ५९ जना विद्यार्थीले कक्षा ६ देखि १० सम्मका प्रतिनिधित्व गर्दै सहभागिता जनाएका थिए। प्रतिस्पर्धी बालबालिकाले प्रस्तुत गरेका कलाकृतिहरूको मूल्याङ्कन ललितकला क्षेत्रमा सक्रिय चित्रकार रबिन कोइराला र श्याम श्रेष्ठले गर्नुभयो। परिणामअनुसार चेल्सी वल्र्ड स्कूलकी आरोशी गुरुङ प्रथम, अरुणिमा मा।वि।की श्रीकन्या चाम्लिङ राई द्वितीय तथा न्यू बुद्ध प्रकाश सेकेन्डरी स्कूलका लामो लोप्चन लामा तृतीय भएका छन्। त्यसैगरी टाइमलाइन स्कूलकी सिजन लामा र जीवनतारा एकेडेमीकी प्रशंसा तामाङ ले सान्त्वना पुरस्कार प्राप्त गरेका छन्। विजयी विद्यार्थीलाई प्रमाणपत्र, ट्रफी र मेडलसहित सम्मान गरिएको थियो।
कार्यक्रममा प्रमुख अतिथि वरिष्ठ कलाकार कृष्ण मानन्धरसहित विभिन्न शैक्षिक तथा सांस्कृतिक क्षेत्रका व्यक्तित्वहरूले बालबालिकामा कलात्मक चेतना र सिर्जनशीलता विकासका लागि यस्ता गतिविधि अपरिहार्य रहेको धारणा व्यक्त गरे।
समारोहको अन्त्यमा आयोजक संस्थाका अध्यक्ष गोपालप्रसाद बरालले सम्पूर्ण सहभागी, निर्णायक मण्डल र अतिथिहरुप्रति आभार व्यक्त गर्दै कार्यक्रम समापन भएको घोषणा गर्नुभयो।